Stationnement à Bastia : les doutes de Francis Riolacci
(A redazzioni d'Alta Frequenza) - Accadi certi volti chì par ùn cambià nulla, ci vulissi à fà un colpu guasgi difficiuli à capì. In fatti, in u cunsighju municipali di Bastia, hè stata vutata, menu l'uppusizioni di u gruppu MCD è l'astenzioni di i gruppi cumunisti è radicali di manca, a tarificazioni di ciò chì hà da rimpiazzà pà l'automobilisti chì ùn pagariani micca i so piazzi i prucessi virbali à u 1a di ghjinnaghju di u 2018 dopu a depenalisazioni di l'assenza di rigulamentu di u staziunamentu chì si paga. S'è a legi era stata appiecata com'ellu ci vulia, l'automobilistu scrianzatu avaria avutu à pagà solu quattru auri, vali à dì u listessu prezzu cà un staziunamentu nurmali. Di fatti, pà pudè fà passà ssu prezzu à 17 auri, vali à dì u prezzu di u PV attuali, una novesim'ora trà 6 ori di sera è 7 ori di sera, cù una tarificazioni à 13 auri, hè stata aghjustata. Un'ora chì sarà virtuali pà l'usadori unesti, postu chì par asempiu, un automobilistu chì paga un ora di staziunamentu à 5 ori è mezu pudarà stà fin'è u lindumani matina à 8 ori è mezu, com'è oghji, senza mancu un cambiamentu di prezzu. Inde l'uppusizioni, aldilà di ssa collera di Francis Riolacci par via di a risa certi volti aciarba di u merri di Bastia, ch'ellu accuseghja di francassi di u dibattitu cù l'uppusizioni grazia à a macagna, ssu dibattitu nant'à ssa regula nova assai difficiuli à capiscia hà parmissu di ramintà l'upinioni propiu dicisa di u cunsighjeru municipali cumunistu nant'à u sughjettu, postu chì d'appressu à ellu a municipalità attuali hè nant'à un ritimu di pagamentu mai vistu di pettu à i bastiacci.
Steti à senta à Francis Riolacci.
Sur le même sujet
