Le Direct

Semi-liberté pour Pierre Alessandri : de multiples réactions politiques

Sò stati numarosi i riazzioni à l’annunciu di a meza libartà cuncessa à Pierre Alessandri.
Gilles Simeoni hà dittu via un cumunicatu ch’iddu « hè ghjuntu u mumentu, senza sminticà nudda di i fatti, è in u rispettu di a mimoria lla vittima è di u dulori lla so famidda, d’apra una pagina nova in i rilazioni trà a Corsica è u statu ».

Pà u cunsigliu esecutivu, issa fasa nova devi purtà à ricunnoscia è assuma insemi, in parigi è in Corsica, tutti i dulori, drami è inghjustizii campati da quinci è da culandi è nati, pà u periudu cuntempuraneu, da un mezu seculu d’una logica di cunflittu.

 

Devi permetta di custruì, via un dialugu rispittosu trà u statu è u populu corsu, cù i so eletti è i so forzi vivi, una suluzioni pulitica glubali, chì piddi in contu i diminsioni suciali, ecunomichi, culturali è sucitali, cuncritizata à liveddu stituziunali cù un statutu d’autunumia ».

Pà u « Un Soffiu Novu », u gruppu d’uppusizioni di dritta à l’assemblea di Corsica, « nudda oramai s’upponi più à a ripresa lli discussioni di Beauvau, à u dialugu ritrovu in cundizioni appaciati è custruttivi. Aspittemu chì ugnunu piddi attu di issa mani nova, è chì i forzi pulitichi prisenti à l’assemblea di Corsica s’ingagini cumplittamenti in lu prucessu lli discussioni, tinindu à menti l’avvena di a noscia isula, è u cuncursu ch’iddu pò purtà u statu à ugni liveddu, in una dimarchja partinariali ».

Pà u PNC « ci sò vulsuti tanti anni in troppu, un drama è un populu in rivolta par avè fatta fini l’appiicazioni llu drittu. Rigritemu ch’idda ci sichi vulsuta a morti d’un patriottu, sittimani di mubilisazioni è l’attaccu di discussioni cù u statu par ch’iddu si faccia valè infini u drittu.

Eppuri, ùn ismintichemu à Alain Ferrandi, intesu ch’hè pocu par binifizià d’issu rigimu, è nè mancu l’altri prighuneri pulitichi. Da ch’iddi poschini vena l’appacià è a suluzioni pulitica, si devini apra i porti lli prighjoni. Cusì n’hè stata pà ugni cunflittu in u mondu. Altru ùn pò essa ind’è no’ ».

Michel Castellani, u diputatu lla prima circuscrizzioni llu Cismonti, dici chì « à tempu missu in meza libartà Pierre Alessandri, ci hà da vulè à turrà a discorra, da ch’idda si metti in viaghju a storia ».
Steti à senta à Michel Castellani.