Réunion sur les déchets avec Ségolène Royal : satisfaction de la majorité territoriale
(A redazzioni d'Alta Frequenza) - U fondu è l'urghjenza : hè cusì chì hè stata amintata a riunioni ssu luni da mani in a prifittura di Corsica trà a ministra di l'Energia, di l'Ambienti è di u Mari è tutti i parsunalità liati à a prublematica di i rumenzuli. Nant'à u fondu, semi d'accordu : Ségolène Royal hà sustinutu largamenti u pianu d'eliminazioni di i rumenzuli appruntatu da a Cullittività tarrituriali di Corsica ; un impegnu finanziariu di u Statu à 70% hè statu ancu annunziatu. Nant'à l'urghjenza, a ministra hà datu dinò infurmazioni assai impurtanti : i travaghji d'apartura di un fossu novu in Tallone si farani à listessu tempu chì a missa in cunfurmità di l'anzianu centru d'intarru. Ssi travaghji, chì principiarani à partasi di luni chì veni, sarani nant'à a racolta di u gaz metanu, à l'urighjini di i prublemi d'odori di a stallazioni è ben intesu di u ricusu di a pupulazioni. Ségolène Royal sarà d'altrondi à a mità di u mesi di lugliu in Corsica torna pà custatà l'avanzata di ssi travaghji. A CTC hà accoltu cù suddisfazioni u sustegnu di u guvernu cuncirnendu u so pianu à longu andà, vali à dì nant'à un spiccu à u primu pianu à u so nivellu stremu è à a missa in opara di un'ecunumia circularia inghjiru à u trattamentu di i rumenzuli. Agnès Simonpietri ci hà dittu dinò calchì parolla nant'à a situazioni d'ughjenza, in Tallone par asempiu.
Eccu l'intervista di a presidenti di l'Uffiziu di l'Ambienti.
