Réunion des élus à Paris : J.C. Angelini boycotte la réunion
Jean-Christophe Angelini ùn ci hè andatu à a riunioni di ghjovi in parigi.
Via un cumunicatu publicatu à nantu à Facebook, si spieca u gruppu Avanzemu.
« In principiu di sittimana, u nosciu gruppu hà dittu ch’iddu participaria à a riunioni di parigi, par parlà di u principiu d’un’evuluzioni pulitica è statutaria pà a Corsica. A diligazioni, l’avia difinita a cunfarenza lli prisidenti, incù dui eletti à gruppu inveci d’unu solu, com’idd’era stata ditta prima.
Avanzemu hà dunqua prupostu dui di i soi, in più di Josepha Giacometti, eletta imparintata, integrata dipoi i primi scambii, à l’iniziativa di u Cunsigliou Esecutivu.
U nosciu diputatu Paul-André Colombani hà dumandatu à l’urganizatori lla riunioni s’iddu ci pudia essa un altru elettu, Saveriu Luciani. L’hè statu rispostu chì pinseri à issu sughjettu ùn ci n’era. Luni, hà dunqua privinutu u dirittori di cabinettu llu prisidenti di u Cunsigliu Esecutivu.
Arisera, à mezanotti, un missaghju lla prisidenza di l’assemblea ci hè statu mandatu, invitendu ci à una nova cunfarenza lli prisidenti, sta mani in parigi. Ben’ch’iddi ci manchini parichji eletti, à issa riunioni, ùn ci hè pussutu andà u nosciu sicondu elettu. A spiicazioni data hè chì a so prisenza ùn era stata validata luni passatu.
Tandu, Jean-Christophe Angelini, u nosciu prisidenti, hà dicisu d’ùn andà ci, à a riunioni d’oghji. Ùn si tratta chivi di diffidenza nè d’ustilità, ma d’un ricusu d’issi maneri chì portani à l’egemunia. Ghjunti ni quì, lachemu i corsi libari di ghjudicà di tutti issi cosi », dici in chjudenda u cumunicatu.
