Restos du Cœur : quelle situation en Haute-Corse ?
Una sittimana fà, Patrice Douret, u prisidenti binivulanti di i « Restos du Cœur », hà dittu ch’iddu era impinsiritu bè : cù a crescita di i binifiziarii, a calata di i doni è a inflazioni, l’associu pudaria essa in piriculu di morti in i trè anni à vena.
Peghju, pà issa invirnata, ci hè u risicu d’ùn pudè suddisfà i bisogna di tutti i binifiziarii.
Dipoi, sò ghjunti aiuti varii è diversi, certi issendu ancu cuntrastati bè, com’è u donu di deci miliona di Bernard Arnault.
Ma issa mubilisazioni ùn a li faci à piattà i difficultà di l’associu.
In Cismonti, i binifiziarii sò crisciuti di 20 %, è i difficultà ammintati à liveddu naziunali si facini senta ancu à liveddu lucali : di fatti, una parti impurtanti di a dutazioni alimintaria veni da a dutazioni naziunali, chì parvia di a inflazioni di l’alimintariu ùn hè più a stessa.
Steti à senta à Françoise Collomb-Luciani, ch’in li sittimani à vena hà da essa a prisidenti di i « Restos » pà u Cismonti.
Sur le même sujet
