Rentrée dans les collèges : qu'en est-il aujourd'hui ?

Issu marti, ci hè statu un chjama è rispondi trà a Cullittività di Corsica è u Ritturatu, à u sughjettu lla riintruta lli culleghji. Hè statu u prisidenti di l’Assemblea di Corsica à parlà in prima. Hà fattu sapè chì parichji parenti è insignanti aviani ricivutu un currieri da uni pochi di stabilimenta. Issu currieri dicia chì « in cunfurmità cù i dicisioni guvirnamintali, u culleghju saria in capacità di riceva l’elevi di sesta è di quinta, à parta si di u 18 di maghju ».Jean-Guy Talamoni è Petr’Antonu Tomasi, u prisidenti llu gruppu « Corsica Libara », ani riagitu subbitu.

Par quist’eletti, « issi lettari facini viulenza à i dicisioni di l’assemblea, è sò à veru un dispettu fattu à i stituzioni corsi, isciuti da u sufffraghju univirsali ».

Ani dumandatu ch’iddu sichi rispittatu, u votu di l’Assemblea.

Steti à senta à Jean-Guy Talamoni

Gilles Simeoni hà riagitu ancu iddu. Pà u prisidenti di l’esecutivu, a dilibarazioni pà a quistioni di a riapartura di i culleghji è licei hè stata bedda chjara :

- A Cullittività di Corsica hà dicisu chì a riapartura ginirali ùn si faria chè di sittembri llu 2020.
- I parsunala aghjunti tecnichi tarrituriali di i stabilimenta d’insignamentu (ATTEE), chì dipendini di a Cullittività di Corsica, cuntinuvighjani à intarvena com’iddi a faciani innanzi à u 11 di maghju (prisenza da assicurà a cuntinuvità pidagogica, com’idd’era privista in tempi di cunfinamentu).

Tandu, a Cullittività cunsidarighja ch’idd’hè indispinsevuli :
- di metta in anda i misuri chì ani da permetta d’appruntà, da avali, a riintruta di sittembri.
- di purtà, à parta si da maghju, i risposti nicissarii à i situazioni di dibulezza è à i difficultà particulari.

Steti à senta à Gilles Simeoni.

In fin’di ghurnata, hè a rittrici chì hà presu à parolla à issu sughjettu, par dì chì « senza a prisenza attiva di l’agenti lla Cullittività di Corsica in carica lla nittera è di l’intrattinimentu di i lucala, nisciunu stabilimentu ùn aprarà, postu ch’idd’ùn si pudarà metta in anda un prutucollu sanitariu strintu ».
« A me priurità assuluta, hà dittu Julie Benetti, hè di guaranzì a sicurità di i parsunala è di l’elevi. L’aghju spiicata à u prisidenti llu Cunsigliu Esecutivu, in un currieri ch’e’ l’aghju mandatu issu ghjornu ».