Réforme territoriale : les travaux toujours en cours
(A redazzioni d'Alta Frequenza) - Riforma tarrituriali è deliberazioni di l'assemblea di Corsica : a terza virsioni di u ducumentu privedi a criazioni di una cullittività tarrituriali nova pighjendu u nomu di Cullittività di Corsica. Rimpiazzaria a CTC è i dui dipartimenti. Pà tena contu di a crescita di i cumpetenzi dati pà a fusioni, t'avaria 63 membri chjamati cunsighjeri di Corsica è eletti sicondu certi mudalità com'è : una circuscrizzioni eletturali unica, un scrutinu di lista à dui ghjiri, una spartera di i posti à a prupurziunali è l'attribuzioni di una prima maghjuritaria di 4 posti. Ss'urganisazioni nova privedi dinò a missa in ballu di una camara di i tarritorii cù un statutu di stabilimentu publicu, cumposta di raprisintanti di l'assemblea è di raprisintanti di l'EPCI mittendu in opara à u pianu lucali certi cumpetenzi di a cullittività è assicurendu a cuurdinazioni di l'intercumunalità. Ssa camara saria in Bastia. U scopu hè di prupona un'architettura tarrituriali più simplici cù una vera spartera di i rispunsabilità è un nivellu intercumunali rinfurzatu. Hè sicura chì a terza scrittura di ssu prughjettu prisintatu dipoi arisera (ghjovi) pò evuluà torna. Par avà, vali à dì à meziornu, ni semi sempri à una discussioni generali annant'à l'insemi di u testu. In fatti, s'aspetta sempri u principiu di l'asamini di più di quaranta amendamenti è, sicondu l'ultimi infurmazioni, ssu travaghju in cumissioni hà da cuntinuà una bella parti di u dopu meziornu. Hè pussibuli, è u cundiziunali hè imperativu, chì l'Assemblea s'aduniscissi in fin di ghjurnata in seenza publica par asaminà u prughjettu novu mudificatu è pà vutallu forsa di manera difinitiva. Corsica Libera hè cuntentu pà contu soiu di u prughjettu com'ellu hè difinitu par avà. U muvimentu naziunalistu ùn prisintarà micca amendamenti pà i raghjoni ch'ellu ci prisenta Ghjuvan Guidu Talamoni.
Steti à senta à Ghjuvan Guidu Talamoni.
Sur le même sujet
