Réforme institutionnelle: les radicaux de Gauche semblent désunis

(A redazzioni d'Alta Frequenza) - Sarà solu stu dopu meziornu (vennari) chì l'Assemblea di Corsica vutarà u raportu nant'à l'istituzioni particulari di a Corsica, quillu chì faci seguita à u raportu appruntatu da a cumissioni di i cumpetenzi legislativi è rigulamentarii, u famosu raportu Chaubon. A ghjurnata d'arimani ùn hè micca bastata - è mancu a notti d'altrondi - u dibattitu essendu maiò è riccu, suventi assai tennicu è cù participazioni sempri cù cunvinzioni pà tutti i gruppi di l'Assemblea di Corsica. Arradicà a Corsica ind'a Custituzioni, o fà ricunnoscia a Corsica da a Custituzioni! Forsa chì u simplici auditori ùn capisciarà micca a sfarenza, eppuru tutta a ghjurnata d'arimani hè stata cunsacrata à què. Pà schjariscia bè tuttu, ci voli à rammintà chì a Corsica, di pettu à i legi di l'82, di u 91 è di u 2002 asisti ind'a Custituzioni francesi par via di u so articulu 72 com'è "cullettività cù un statutu particulari" - com'è Parighji, Liò o Marseghja - è què senza cità la di modu pienu. Aghjustemi dinò chì l'articulu 73 di a Custituzioni gistisci u quadru custituziunali di i Cullettività d'Outre Mer, Pulinesia, Saint Pierre et Miquelon par asempiu. Ssi sfarenti statuti, chì parini essa certi volti assai vicini, ùn portani micca malgradu tuttu à u listessu modu di guvernenza è s'hè vistu parechji volti chì u statutu di a Corsica inghjinnava troppu fenomeni di "blucchimi". Fà cambià a Corsica di categuria, di divisioni diciarani certi amatori di ballò, eccu dunqua l'inghjocu di stu dibattitu impurtanti parchì u funziunamentu di l'istituzioni di l'isula pudaria essa mudificatu di manera prufonda s'è l'affari sbocca. Tuttu u dibattitu d'arimani hà purtatu dunqua nant'à u cambiamentu di "divisioni" ma firmendu à tempu ind'a categuria "articulu 72", un eserciziu cumplicatu chì criava guasgi l'accunsentu arisera. A discussioni ghjinirali s'hè compia versu setti ori è mezu è s'è l'Assemblea di Corsica hà cuntinuatu a so riunioni cù un prugrammu urdinariu, un travaghju longu in cumissioni hà principiatu pà asaminà numarosi amendamenti. L'assemblea vultarà dunqua stamani à partasi da 10 ori pà vutà l'amendamenti eppo si passarà à u votu dopu à i spiecazioni di votu di i sfarenti gruppi. I radicali di Manca pariani piuttostu micca uniti nant'à ssu cartulari; da l'INNÒ seccu d'Aline Castellani à l'IÈ forsa di François Tatti si vidarà bè stamani s'è un accunsentu hè statu trovu nentru à ssu gruppu.

Ecoutez François Tatti.