Réforme des institutions : début du débat
(A redazzioni d'Alta Frequenza) - L'Assemblea di Corsica hà principiatu à 3 ori l'asamini di un sughjettu assai impurtanti pà l'avvena di l'isula : a riforma di l'urganisazioni tarrituriali di a Corsica. Dopu à una prisintazioni corta di u dibattitu da Dominique Bucchini in seenza publica, l'assemblea hà suspesu i so travaghji pà ritirassi in cumissioni. Si tratta esattamenti di a cumissioni di i cumpetenzi legislativi è rigulamentarii di l'Assemblea di Corsica, ditta cumissioni Chaubon, chì hà ripresu i so travaghji pà pruvà à truvà a bona articulazioni cuncirnendu un sistema di guvernenza bè adattatu à a Corsica. Ùn si parla micca pà daveru di suppressioni di i dipartimenti, ma piuttostu di a fusioni di i trè istituzioni maiò di l'isula. Un'assemblea di Corsica sustinuta da dui cumissioni, culleghji, uffizi, a scelta ùn hè ancu abbastanza chjara, raprisintendu i dipartimenti duvaria essa u muntami ritinutu infini. L'aghjustamentu bonu pari difficiuli à fà parchì i sfarenzi di punti di vista sò prisenti in tutti i currenti pulitichi. Ci sò in fatti quilli chì battini à prò è quilli chì sò contru in ogni famighja, ciò chì spiega a difficultà di truvà un accordu chì pudissi cunvena à pocu pressu à tuttu u mondu. A pruposta di a cumissioni di i cumpetenza legislativi è rigulamentarii saria stata cambiata parechji volti, è l'amendamenti assai numarosi prisintati da parechji gruppu pudariani fà durà u dibattitu duranti tutta a nuttata.
Steti à senta à Paul Giacobbi, micca annant'à u cuntinutu di a riforma ma bè annant'à a filusufia chì porta ssu prughjettu.
Sur le même sujet
