Le Direct

Redécoupage intercommunal pour l'Alta Rocca : l'avis du préfet de Corse

(A redazzioni d'Alta Frequenza) - U prifettu di Corsica hà prisintatu dunqua ssu ghjovi u prughjettu di Schema Dipartimintali di Cuuperazioni Intercumunali di a Corsica Suttana. C’hè par avà 11 intercumunalità in u dipartimentu è u Statu pruponi di riducia ssu numaru à 5. U schema privedi dinò a dissuluzioni di 25 sindicati di cumuni trà u 2017 è u 2020. U dispusitivu amministrativu novu si cumpunaria cusì : ci saria dunqua una cumunità di cumuni di u Punenti di a Corsica, cumposta di 33 cumuni è d’appena di più di 7 500 abitanti ; faci à pocu pressu un triangulu maiò trà Pastricciola, Tiuccia è Osani. A siconda intercumunalità, a più maiò di u dipartimentu, hè custituita di sicura da a CAPA, chì saria unita cù i cumunità di cumuni di u Prunelli è di a Gravona ; si ghjunghjaria tandu à 21 cumuni pà appena di più cà 90 000 abitanti. L’Urnanu è u Taravu si vidariani impona una mudificazioni di perimetru ; ss’intercumunalità saria cumposta di 27 cumuni pà più di 10 000 abitanti ; à u nivellu geugrafficu, si pudaria traccià una diagunali longa trà Palleca è Sarra di Farru, ma chì includaria dinò a sponda meziornu di u golfu d’Aiacciu. U Sartinesu è u Valincu è u Taravu cunnosciarani dinò una mudificazioni di perimetru, cù 18 cumuni è più di 11 500 abitanti. Vinaria dopu u Grandi Meziornu, chì subisciaria dinò ellu fusioni trà l’anziani cantoni ; saria custituitu da 25 cumuni pà più di 27 000 abitanti. S'è a suddisfazioni hè propiu mezana in guasgi tutti l'anziani cantoni, si parla di collera inde l'Alta Rocca chì sarà integrata in un perimetru bellu più largu, postu ch'ellu andarà da Bunifaziu fin'è Sari Sulinzara. A paura di spariscia com'è entità geugraffica è umana hè forti pà ssi lochi è sedeci merri ani manifistatu ghjovi davanti a prifittura di Corsica. L'Alta Rocca inde u "Grand Sud"?

Steti à senta à Christophe Mirmand, u prifettu di Corsica, chì ci dà u so parè.