Reconnaissance de l’État palestinien par l’Assemblée de Corse : la mise au point de la présidence
Passata una duminicata di pulemichi, Marie-Antoinette Maupertuis, a prisidenti di l’assemblea di Corsica, hà vulsutu metta i cosi à u puntu, par ciò chì tocca à a muzioni di ricunniscenza di unu statu palistinianu vutatu da l’assemblea corsa.
À senta la « l’aduzzioni d’issa muzioni veni in u mentri ch’un mari d’indignazioni tocca l’Auropa, a cumunità internaziunali, è ancu l’upinioni publica isrealiana è a cumunità ghjudea, impinsiriti bè da a situazioni dramatica di i civili palistiniani. Issa muzioni ùn iscanta mancu stampa u drittu d’Israela à asista in paci è in sicurità. Issu drittu hè mintuvatu di manera chjara in u scrittu, com’è d’altrondi dui rifarenzi à muzioni aghjà vutati da l’assemblea di Corsica : quidda di u 27 d’uttrovi di u 2023 è quidda di u primu di marzu di u 2024, chì cundannaiani di manera bedda chjara u maceddu di u Hamas di u setti d’uttrovi, è dumandaiani a libarazioni di l’ustaghji.
Dici a prisidenti ch’iddu si rimetti cusì u dibattitu à un liveddu ghjustu : più di 50 000 civili sò stati tumbi in Gaza dipoi uttrovi llu 2023, trà i quali ziteddi à millai. I famiddi intrevi sò sipolti in i ruvini. A fami ghjova da arma di guerra. Hè ancu presu in mira l’aiutu umanitariu. Di pettu à issa straghji, ùn hè un uzzioni u silenziu. Ùn hè una pustura a neutralità. A indignazioni ùn pò essa affari di scelta. L’assemblea di Corsica hà sceltu di prununcià si di manera chjara, fida à i valori umanisti di u populu corsu. Tutti i naziunalisti ani sceltu d’accumpagnà issu votu à nomu di u drittu di i populi à dispona d’iddi stessi, è quissa hè a fundalizia di u nosciu cumbattu, da quand’iddu hè. Cuntinuvaremu à difenda una parolla libara è degna, chì ùn cedi nè à a intimidazioni, nè à u sminticu. Parchì ugni populu hà drittu à campà. È chì mai a paci nasci da a indiffarenza ».
Sur le même sujet
