Le Direct

Rapport de la Chambre Régionale des Comptes sur la mairie de Bastia : Pierre Savelli réplique

Dopu à a isciuta llu raportu pruvisoriu lla Camara Righjunali lli Conti, chì tratta lla gistioni lla mirria di Bastia trà u 2012 è u 2020, Pierre Savelli, u merri, hà dicisu di risponda à i critichi.

Parlendu di i risorzi umani, dici Pierre Savelli chì « quand’iddu s’apri una sala di spittaculi, una mediatecca è una casa lli scenzi in i quartieri pupulari, quand’iddi si duppiani i passaghja cutidiani lli squadri di pulizia, quand’iddu si faci di a lingua corsa, di a dimucrazia participativa è di u sviluppu à longu andà priurità, quand’idda si duppia a capacità lli cantini sculari, ùn hè cliintillismu : hè sirviziu publicu ».

Parlendu di i rimprovari pà u tempu di travaddu lli parsunala è u ricrutamentu,  dici chì « l’affari sò stati fatti cù chjarura, è rispittendu furmalmenti i prucidimenti privisti da a legi ».

Ricusa, Pierre Savelli, ch’iddi sichini indittati l’agenti municipali : « In Bastia, si travadda quant’è in l’altri cumuni di stessa misura, è d’altrondi ci si travadda di più chè innanzi à u 2014 ».

Spieca, u merri, a crescita llu prezzu di l’Aldilonda : « quand’iddu si porta à terminu un prughjettu d’accizzioni com’è quiddu d’una verga supra à u mari, arrimbata à i rampali storichi, a strema pricisioni tecnica lli travadda pò purtà à mudificà a spesa ».

U merri di Bastia ni prufitta par lintà una biacculata à u mandatu d’Emile Zuccarelli, dindu chì « i bastiacci, inveci, ùn capiscini tantu chì u cimiteriu di l’Ondina, ch’hè custatu aghjà 6,6 miliona, si sichi sfraiatu, è ch’iddu ci volga par riapra lu 10 miliona di travaddi in più. Ùn ni semu rispunsevuli, ma paghemu sempri oghji i cunsiquenzi umani, ghjuridichi è suldarini di u scandalu di l’Ondina ».