Pumuntincu, ta graphie fout le camp !
(A redazzioni d'Alta Frequenza) - "Pumuntincu, ta graphie fout le camp !" Eccu l'infrasata d'intruduzzioni putenti di u manifestu pumuntincu scrittu da dui grandi autori in lingua corsa, Rinatu Coti è Roger Miniconi, fendu sapè a so inchietudini maiò par via di a situazioni di a varietà di corsu scritta ind'u meziornu di l'isula. D'appressu à elli, c'hè oghji un'egemunia di a grafia cismuntinca, di u nordu di a Corsica dunqua, è i desiderii chì nascini o crescini d'unifurmisazioni di a lingua corsa di l'uni è di l'altri vidaria a varietà suttanaccia propiu tralasciata. Sempri sicondu Rinatu Coti è Roger Miniconi, a colpa à scelti pulitichi soprattuttu fatti à u nivellu isulanu u più altu, l'Università di Corsica, i so "capizzoni" è u so insignamentu. À u mumentu duva u dibattitu nant'à a cuufficialità di a lingua corsa hè di più in più forti, par asempiu par via di u votu intarvinutu pocu fà di u Parlamentu aurupeu à prò di a salvezza di i lingui righjunali è minuritarii, ss'altru dibattitu veni, ancu puru s'ellu hè leghjetimu, hà fà rinascia ssa pulemica bullenti. Una cartula di u Pumuntincu hè stata fatta d'altrondi da l'autori di u manifestu, pà a missa in ballu di parechji misuri pà u rispettu veru d'ogni varietà linguistica, è fà chì u pumuntincu, com'è tutta una cultura, ùn sprufundessi micca. Pà riceva ssu manifestu, mandeti puru un mail à: r.coti@wanadoo.fr
Ecoutez Rinatu Coti.
