Propos de Gérard Darmanin : les réactions en Corse

Dopu à u discorsu fattu da u ministru francesu di l’internu pà i 25 anni di a morti llu prifettu érignac, sò stati numarosi i riazzioni pulitichi in Corsica.

Jean-Félix Acquaviva, u diputatu lla siconda circuscrizzioni llu Cismonti, hà dittu chì « u dialugu pò ripiddà, cù una pirspittiva chì pidda in contu a suluzioni pulitica glubali aspittata da i corsi. Semu pronti. Incù ditarminazioni, sincerità, cunvizzioni, è avendu par sola bussula u intaressu di u Populu Corsu è a paci ».

Marie-Antoinette Maupertuis, a prisidenti di l’assemblea, hà dittu chì « i corsi bramani di campà in paci, ed hè u sensu di u nosciu ingagiamentu : custruiscia una paci duratoghja pà u nosciu populu è a noscia ghjuvantù. À veda ni u discorsu llu ministru, pari chì u statu sichi dispostu à lià si à issu sforzu è à piddà a via di a cuncordia.

Issi manera di veda hè pusitiva, è auguremu ch’idda durghi longu à u prucessu lli discussioni par l’autunumia, chì devi ripiddà da quì à pocu. Ùn ci vol’ch’idda sichi dillusa, una volta di più, a spiranza di i corsi. A scumissa hè di quiddi impurtantissimi è t’avemu tutti, eletti corsi è guvernu, u duveri di a riescita ».

Josepha Giacometti, à nomu di Corsica Libara, hà dittu chì « a paci ùn si pò dicrità. Si devi custruì, è ni semu sempri à aspittà l’atti. Ni semu à aspittà di veda sè cinquanta anni di cumbattu, tradutti parichji volti dimucraticamenti in l’urni, ani da essa presi in contu ».

Paul-André Colombani, u diputatu lla siconda circuscrizzioni llu Pumonti, hà dittu à Via Stella chì l’affari era « meddu chè cinqui anni fà ». Hà dittu u diputatu ch’iddu hà prifiritu i parolli d’oghji, « si voddi una pagina, s’evuluighja », à quiddu famosu « certi cosi ùn sò da pieta ».

« Si hè resu umaghju à u prifettu érignac, ed hè nurmali, ma si hè parlatu ancu di « i morti ». Issi parolli sò impurtanti, grevi di sensu. Hè ciò chì firmarà in a storia sè à veru, in seguitu, ci sò i risultata à liveddu stituziunali ».

U sinatori Jean-Jacques Panunzi, infini, hà dittu ch’iddu si trattaia « d’un discorsu d’appaciamentu ». U sinatori Panunzi pensa chì u ministru Darmanin « hà porsu a mani à u prisidenti di l’esecutivu, à a Cullittività di Corsica, dindu ch’iddu era prontu à aiutà ci, à accumpagnà ci in tutti i nosci dimarchji è in a custruzzioni d’un tempu novu ».