Procès en appel des gîtes ruraux : le rôle de Thierry Gamba-Martini passé au crible
(A redazzioni d'Alta Frequenza) - Ssu marti dopu meziornu, dopu à Jacques Costa, hè u direttori generali di i sirvizi di u Cunsighju Generali di Corsica Suprana à l’epica di i fatti, Thierry Gamba Martini, chì hè statu intarrugatu da a Corti d’Appellu di Bastia pà u prucessu in appellu di l’affari di l’alloghji campagnoli. Hà dittu ch’ellu ùn hà mai vistu i cartulari à signà chì cuntiniani i schedi nant’à i ditti alloghji campagnoli, mittendu in risaltu u numaru impurtanti di cartulari à signà inde u scagnu di u cabinettu di a presidenza. Thierry Gamba Martini hà dittu dopu chì u cabinettu di Paul Giacobbi avia pighjatu un pesu eccessivu. Dopu, l’ombra di Jean Leccia hè stata torna prisenti duranti ssu prucessu in appellu, frà altru cù un’infrasata carca à sensi di Thierry Gamba Martini. Quissu quì avaria « vulsutu chì Jean Leccia sighi sempri quì, prima parchì saria sempri vivu, eppo parchì ùn saria micca [à a piazza di Jean Leccia] oghji ». Thierry Gamba Martini hà amintatu da un’antra banda chì Jean Leccia ùn l’hà mai missu à u currenti di qualsiasi prublema liatu à u cartulari di l’alloghji campagnoli, è ch’ellu li facia cunfidenza. D’appressu à Jean Sébastien de Casalta, u so avucatu, Thierry Gamba Martini ùn duvia micca passà davanti a ghjustizia di pettu à l’elementi di u cartulari.
Steti à senta à Jean Sébastien de Casalta.
