Le Direct

Procès en appel des gîtes ruraux : des peines moins lourdes qu'en première instance

(A ridazzioni d'Alta Frequenza) - Rindia marcuri u so ghjudicamentu a Corti d'Appellu di Bastia, pà u prucessu in appellu dittu di i "gîtes ruraux". Com'è in prima istanza, hè statu disculpatu Jacques Costa. Pà i cinqui altri incausati, sò stati cundannati, ma à peni menu grevi. Paul Giacobbi, cundannatu pà "arrubeghju di solda publichi", è u solu à ùn essa prisenti à issa dilibarazioni, s'hà buscu sta volta trè anni di prighjoni attimpati, 25000€ d'amenda è cinqui anni à ùn pudè essa elettu. L'anzianu prisidenti llu cunsigliu ginirali di Cismonti, chì dici chì issu ghjudicamentu hè unu scandalu, à senta à u so avucatu, andarà in cassazioni. Thierry Gamba Martini, u dirittori lli sirvizia di tandu, hà avutu una cundanna d'ottu mesa attimpati. Ciò chì l'era rimpruvaratu hè oramai difinitu da "laca corra". Listessa missa in causa è sei mesa attimpati pà Marie-Laure le Mée, quadra amministrativa. Jean-Hyacinte Vinciguerra, u merri di i Perelli è agenti llu cunsigliu ginirali, s'hà buscu diciottu mesa attimpati è cinqui anni à ùn pudè essa elettu, par "arrubeghju di solda publichi". È infini, pà Pierre-Marie Mancini, u merri di Costa è cunsiglieri ghjinirali tandu, a cundanna hè stata cambiata in "piattera di cumplicità d'arrubeghju di solda publichi". Hè statu ancu iddu cundannatu à diciottu mesa attimpati è cinqui anni à ùn pudè essa elettu.