Procès de Sisco : les impressions de l'avocate des deux habitants du village

(A redazzioni d'Alta Frequenza) - Sottu à l'ochji spalancati di media naziunali chì cuntinuavani à intarissassi dipoi un mesi d'una manera strana è micca sempri fida à evenimenti chì ùn erani micca, u prucessu di l'affari di Siscu hà fattu spuntà dopu à dodeci ori di dibattiti compii in mità di nuttata u so ghjudicamentu in un calmu è una sirenità chì ani cuntrastatu cù a paranoia di certi avucati di a difesa chì da u so altari francilianu cridiani di sapè meghju cà nimu altru, meghju cà i corsi soprattuttu, chì ss'affari pudia essa ghjudicatu solu in a prissioni è l'isteria cullittiva in un Palazzu di Ghjustizia di Bastia troppu chjucu, traspurtendu u cuntestu cusì caru à i ghjucadori di ballò impauriti in a stituzioni chì hè a ghjustizia. Di fattu, dopu à un'audienza induva Mustapha Benhaddou, u solu di i trè frattelli maruccani prisenti à l'audienza parchì imprighjunatu di manera pruvisoria, hà adimessu ch'ellu hà missu un schjaffu à u ghjovanu Jerry Neumann è avè avutu un arponi in manu duranti a baruffa cù u so babbu senza ricunnoscia avè tiratu malgradu tuttu, l'elementu mutori di ss'affari sicondu u prucuratori di a Republica di Bastia hè statu cundannatu à dui anni di prighjoni assicurati. I so fratelli, Jamal è Abdelilah sò stati cundannati à sei mesi attimpati. Pà ciò chì tocca i sischesi, duranti un'audienza induva Lucien Straboni hà adimessu ch'ellu hà minatu a lettica induv'ellu c'era Jamal Benhaddou duranti a so presa in carica da i succorsi, u prima citatu hè statu cundannatu à un annu attimpatu, mentri chì Pierre Baldi hè statu cundannatu à ottu mesi di prighjoni attimpati pà un calciu ch'ellu dicia micca vulintariu. Cuncirnendu a difesa di i dui sischesi, Lucien Straboni è Pierre Baldi, c'era di sicuru l'amarezza à u mumentu di a dicisioni. Un'amarezza chì si spiega par asempiu da u marosulu mediaticu chì hà accumpagnatu l'affari, marosulu chì pudaria spiegà ssu ghjudicamentu sicondu maestra Rosa Prosperi, avucata di Lucien Straboni è Pierre Baldi cù maestri Marc Antoine Luca.

Steti à senta à Maestra Rosa Prosperi.