Procès de la manifestation d'octobre 2016 à Corte : du sursis requis contre les cinq prévenus
(A redazzioni d'Alta Frequenza) - C’era ssu marti u prucessu di cinqui omi trà vintidui è vint’ottu anni suspittati d’avè participatu à fochi di rumenzuli, à cannetti è buttigli di bieri lampati, eppo d’avè datu, pà certi, calci à gendarmi davanti a sottu prifittura è a gendarmeria di Corti in a sirata trà u 12 è u 13 d’uttrovi di u 2016. Ssi fatti erani accaduti duranti un’adunita di sustegnu à Nicolas Battini, Ghjiseppu Maria Verdi è Stéphane Tomasini. Un prucessu chì hè principiatu cù u discorsu puliticu d’unu di i privenuti, discorsu accurtatu dopu à calchì minuta da a presidenti di u tribunali currizziunali di Bastia, chì ùn vulia senta pulitica inde a so sala d’audienza, trè altri privinuti aviani privistu anch’elli di leghja un missaghju puliticu cuncirnendu a lotta pà l’indipindenza di a Corsica. Dopu à què, u prucessu, chì hè duratu guasgi cinqui ori, s’hè passatu inghjiru à l’asamini di parechji videò di a sirata, pà pruvà à ditarminà u nivellu d’impegnu di tutt’ognunu. U ministeru publicu hà dumandatu trà quattru è sei mesi attimpati di prighjoni è 600 auri d’amenda contr’à l’accusati, mentri chì l’avucati di quattru di i privenuti ani dumandatu chì i so clienti sighini assolti è chì l’avucatu di u cinquesimu hà dumandatu listessu affari nant’à a maghjurità di i fatti rimpruvarati à u so clienti.
Steti à senta à Stella Canava, l’avucata d’unu di l’accusati.
Sur le même sujet
