Procès de Bruno Garcia-Cruciani : les plaidoiries fermes des parties civiles avant les réquisitions et le verdict ce mercredi
Marti in dopu meziornu, mentri u prucessu di Bruno Garcia-Cruciani, ghjudicatu pà l’assassiniu di Julie Douib, ani parlatu l’avucati lli parti civili.
Francesca Seatelli, à nomu lli fiddoli llu coppiu, hà spiicatu ch’idd’ùn si trattaia chivi « d’urfagni urdinarii, ma di ziteddi fatti urfagni da a mani è da a scelta d’un omu chjamatu babbà ».
« Ancu puri ch’iddi vochini meddu oghji, chì ghjuvanotti, chì omini avarani da duvintà ? », quistiunighja l’avucata.
Parlendu di u sminticu chì tocca ugnitantu i ziteddi urfagni dopu à un fiminicidiu, hà dittu à a ghjuria : « ùn li sminticheti po’ micca ghjunta a dilibarazioni, ùn sminticheti chì u babbu l’hà cundannati à u dulori in perpetuu ».
Francesca Seatelli hà ancu dittu chì, à torru à a sintenza, à u tribunali lli tuccarà forsa à trattà u pussibuli ritiru intigrali lli dritti parintali.
Steti la à senta.
Jean-Sébastien de Casalta, riprisintenti lli parenti di Julie Douib, hè statu beddu uffinsivu. Par iddu, « Bruno Garcia-Cruciani hà fattu schiattà a filicità d’issa famidda. Semu chivi par dà nomu à issu crimini chì, in i turmenti è a morti di Julie Douib, s’assumidda à veru à un’esecuzioni. Bruno Garcia-Cruciani hè duvintatu un omu luntanu da l’omini ».
L’avucatu lli partiti civili dici chì l’omu voli fà d’issu prucessu una carnavalata. « Cuntà bucii à issu puntu, hè quant’è à tumbà à Julie Douib una siconda volta ».
Vurria l’avucatu chì, trà mezu à i so spiicazioni mischini, l’omu sichi toccu da un rimorsu senza fini.
Par compia, è par ciò chì tocca à a primiditazioni, Jean-Sébastien de Casalata hà dumandatu à a ghjuria di dì chì « Bruno Garcia-Cruciani hè un assassinu ».
Steti à senta l’avucatu.
Sta mani, Charlotte Béluet, l’avucata ginirali, farà senta a so riquisizioni. Dopu, è par l’ultima volta, parlarà a difesa, è forsa ancu Bruno Garcia-Cruciani.
A sintenza duvaria cascà in dopu meziornu.
