Primaires à droite : les Républicains 2B veulent voir Nicolas Sarkozy candidat
(A redazzioni d'Alta Frequenza) - Nicolas Sarkozy ubligheghja i so sustegni pà a primaria di diritta à ghjucà cù i parolli. In fatti, a federazioni di i Républicains di Corsica Suprana, purtata da a so presidenti, Stéphanie Grimaldi, u diputatu è merri di Biguglia, Sauveur Gandolfi Scheit, u merri di Borgu Anne Marie Natali è altri eletti hà fattu cunnoscia tuttu u so sustegnu à a chjama lampata da Nicolas Sarkozy da fà ch’ellu sighi candidatu à a primaria. Ind’i fatti, ss’eserciziu di cuntursioni ind’a furmulazioni piatta un cumitatu di sustegnu à Nicolas Sarkozy, futuru candidatu à a primaria di diritta, chì faci un veru ghjiru di Francia ma chì, par avà, ùn hà micca prununziatu a famosa infrasata, « socu candidatu ». Una primaria induva Nicolas Sarkozy t’avarà com’è avversariu maiò Alain Juppé, assai sustinutu da parechji eletti isulani, com’è u diputatu è merri d’Aiacciu Laurent Marcangeli o u cunsighjeru tarrituriali Jean Martin Mondoloni. È ancu s’è l’unioni dopu a primaria hè dumandata è vulsuta da tutti i maestri di a diritta corsa, a basa militanti t’hà un antru parè, postu chì certi militanti ni volini sempri à Alain Juppé par asempiu di pettu à l’episodiu di a cunfarenza di stampa clandestina di Tralonca.
Steti à senta à Stéphanie Grimaldi, a presidenti di i Républicains di Corsica Suprana.
Sur le même sujet
