Présidents Simeoni et Talamoni à Matignon : la LDH de Corse se mêle au débat
(A redazzioni d'Alta Frequenza) - Hè ssu luni à 5 ori chì u Prima ministru, Edouard Philippe, ricevi in Matignon i presidenti di l'Esecutivu è di l'Assemblea di Corsica, Gilles Simeoni è Ghjuvan Guidu Talamoni. Un scontru aspittatu da l'eletti di a maghjurità tarrituriali, chì aspettani risposti nant'à sughjetti assai pulitichi chì ùn c'hè micca bisognu à ramintà vistu ch'elli sò stati frà altru à u centru di l'ultima campagna eletturali. A sizzioni corsa di a Liga di i Diritti di l'Omu hà urganizatu una cunfarenza di stampa sabbatu da mani nant'à u sughjettu. A LDH dici ch'ella ferma attenti à ssu prucedimentu di dialogu chì si forma. Inveci, d'appressu à ella, u guvernu devi pighjà in contu l'aspirazioni di i Corsi spuntati duranti l'ultimi alizzioni, è micca ramintà d'una manera sistematica "ligni rossi" ch'ellu ùn ci voli micca à francà, inde a perspettiva d'un dialogu appaciatu è custruttivu. A Liga di i Diritti di l'Omu incalca nant'à trè rivindicazioni in particulari : a scrizzioni di a Corsica nentru a Custituzioni, l'avvicinamentu di tutti i prighjuneri pulitichi nant'à l'isula è a fini di a riprissioni contr'à i militanti naziunalisti.
Steti à senta à André Paccou pà a sizzioni corsa di a LDH, è pà quali da un'antra banda l'incidenti accadutu vennari in a prighjoni di Borgu ùn devi micca essa una scusa par ùn avvicinà micca i prighjuneri pulitichi in Corsica.
