Plusieurs opérations pour la SNSM Propriano ce dimanche
Hè stata bedda tribulata a sirata di duminica, pà i salvadori à mari di a SNSM di Prupià.
Versu i setti ori è quartu, rispundindu à una chjama di u CROSSMED di Corsica, sò stati ingagiati in urgenza da circà una parsona sparita à mari, è purtà li aiutu.
Un omu, ch’era mossu à natà partindu da a marina di Purtiddolu, ùn avia datu più segnu di vita. Impinsirita bè, hè stata a moglia, ferma à nantu à a rena, à averta i succorsi.
Parichji mezi di a SNSM, ch’erani tandu impignati in u dispusitivu di i « Festi di u Mari », sò stati mandati culandi à a dumanda di u CROSS.
Ghjunti prestu supr’à locu, i meza di succorsu ani pirmissu, dopu presi i infurmazioni ind’è i tistimogni, di lucalizà a parsona : arrampiccata à unu scoddu, à cintunai di metra da u bor’di mari, era fiacca in tuttu ma cuscenti sempri.
L’omu, in difficultà ch’era un pezzu, hè statu purtatu in tarra ferma salvu è in saluta, beddu cumossu ma fertu micca.
In primu dopu meziornu, una navi à veli di dodici metra hà signalatu ch’idda era impittata in un fustu di legnu chì gallizaia.
Impinsiriti da u statu llu so fasciamu, i parsoni à bordu ani dumandatu una spizzioni suttimarina.
À a dumanda di u CROSSMED, hè stata ingagiata una squadra di salvadori ciuttadori di bordu di u centru SNSM di Prupià.
À a navi, ch’era ghjunta in portu da par idda, li si hè pussuta fà a spizzioni in sicurità.
I ciuttadori ani datu cunfirma chì i danni erani pochi, senza intoppi impurtanti.
Fatta fini, hè stata più a paura chè u dannu pà l’omini à bordu.
Sur le même sujet
