Plus de 100 hectares de végétation parcourus par les flammes en Corse
(A redazzioni d'Alta Frequenza) - Ghjurnata nera ssu vennari à u nivellu di i fochi in Corsica, cù parechji chì sò partuti in Balagna, in Piaghja Urientali, è in Corsica Suttana strema, attizzati da un ventu forti è un tempu assai seccu. Prima in Santa Riparata di Balagna in principiu di matinata, in u paisolu d'Ucciglioni, induva 14 ettari di vegetazioni ani brusgiatu; u focu hè statu ammiastratu solu à centu metri di i casi. Ligni elettrichi sò stati distrutti dinò, privendu cusì d'elettricità parechji abbunati. In A Ghisunaccia è i so lochi dopu, cù parechji fochi. In Ghisunaccia Gara, i fiari ani parcorsu 25 ettari. Vicinu à u campu d'avviazioni d'Alzitone, u focu s'hè spargugliatu in furia è ani toccu par asempiu una casa à 100%. Parechji parsoni sò stati ubligati à sorta da i so casi. L'accessu à a strada naziunali hè statu bluccatu da i gendarmi, à u nivellu di a surtita nordu di A Ghisunaccia. Infini, in Sari Sulinzara è Sularu, a prissioni hè stata forti dinò. 28 bungalows di un camping sò stati distrutti, stallazioni pà l'asgi, dui vitturi è un battellu. Più di 500 turisti chì stavani in ssu camping sò stati ubligati à truvà un antru alloghju. U focu, partutu da a cumuna suttanaccia, hè passatu in furia annant'à quilla supranaccia. Più di trenta ettari sò partuti in pulvina par via di ssu focu chì hà minacciatu quì dinò parechji casi. A strada hè stata dinò sarrata ind'i dui sensi. In tuttu, è cutendu altri fochi appena menu impurtanti, sò più di 100 ettari di vegetazioni chì sò smariti pà ssu ghjornu di Santa Maria in Corsica. Centunai d'omi di i spignifochi, gendarmi, è mezi aerei di tutta a Corsica è di u cuntinenti sò intarvinuti. S'è a maiò parti di i fochi hè ammaistrata, a vigilenza a più maiò sarà torna prisenti ssu sabbatu.
Sur le même sujet
