Pluie et orage : vigilance orange en Corse-du-Sud jusqu'à demain matin
(A redazzioni d'Alta Frequenza) - Dipoi stamani (marti) a Corsica Suttana, duva si pò custatà acquati è timpurali impurtanti, hè sottu à a vigilenza aranciu. In fatti, u dipartimentu hè toccu, cù intensità pà l'acquati chì, d'appressu à l'infurmazioni di i maghjini radars, andariani aldilà di 30 mm pà ora. Issu cuntestu meteorulogicu dura a ghjurnata sana, cù quantunqua un'accalmia pussibuli in prima parti di notti, fin'è dumani matina à 6 ori. I cumuli pudarani andà o trapassà 120 à 150 mm in 24 ori, è à spessu 80 mm in menu di 3 ori. Calchì falata di petri, cantini è lucali inundati sò stati censati, intarvinzioni micca troppu gravi malgradu tuttu. Quattru vitturi sò stati quantunqua surpresi da a cullata di l'acqua nant'à a strada dipartimintali 59 in Sotta, à u locu dittu Borivoli. I parsoni sò stati presi in carica da i succorsi è missi in securità. A strada dipartimintali 59 (paisolu di Mela) sempri ind'u settori di Sotta, a strada dipartimintali 659 à u nivellu di u ponti di l'Arca è i CD di Borivoli è Bacchia (settori di Purtivechju) sò pruibiti à a circulazioni. Da nutà infini chì i fiumi di l'Osu, Stabiacciu è Cavu sò survighjati. Di pettu à issi cundizioni meteurulogichi pessimi, a più grandi prudenza hè racumandata.
Sur le même sujet
