PLU d'Ajaccio : Annulation partielle confirmée en appel
Via un cumunicatu, a cità d’Aiacciu hà fattu sapè chì a corti amministrativa d’appellu di Marseglia hà righjittatu a dumanda di l’associu « U Levante », chì vulia ch’iddu sichi abrugatu in tuttu u PLU lla cità impiriali.
« Pà issu puntu, a corti hà cunsidaratu chì a stesa di i zoni agriculi è di i zoni naturali era crisciuta, à pettu à u PLU di u 2013 », spieca a dirizzioni municipali.
I dumandi fatti da particulari è da una sucità civili immubiliari sò stati righjittati ancu iddi.
« Inveci, a Corti amministrativa d’appellu di Marseglia hà stimatu ch’iddu ci vulia à dà cunfirma di u ghjudicamentu llu tribunali amministrativu di Bastia, ch’avia dicisu di riqualificà certi sittori. A classifica di u sittori di Barbicaghja in zona urbana, è di i sittori di u Loretu è di u Finuseddu in zona à urbanizà sò stati abrugati ancu iddi ».
Infini, a ghjuridizzioni hà cunsidaratu ch’iddu ci vulia à righjittà l’appellu di a cumuna contru à u ghjudicamentu llu tribunali amministrativu di Bastia, par ciò chì tocca à a classifica di u sittori di u Prunelli in zona naturali eculogica sinsibuli. À nantu à issu situ, a CAPA è a Cità aviani pinsatu à custruì u novu centru di trattamentu di scarti è rumenzuli, prughjettu dittu d’intaressu ginirali è publicu.
I dui cullittività aviani aghjà presu nota d’issa dicisioni in prima mani. Di fatti, u cunsigliu cumunitariu hà validatu a criazioni d’iss’arnesu in a Mizana, à nantu à a cumuna di Sarrula è Carcupinu », pricisa a cità d’Aiacciu, chì stima chì a ghjustizia hà cunfurtatu u ducumentu PLU in i so principali uriintazioni pulitichi è dispusizioni.
Sur le même sujet
