Pierre-Marie Mancini élu président de l'association des maires de Haute-Corse
(A redazzioni d'Alta Frequenza) - Ssu sabbatu, in Siscu, l’associu di i merri di Corsica Suprana, adunitu in un cungressu, hà elettu u so novu presidenti. In fatti, Ange Pierre Vivoni, u merri di Siscu, ùn si raprisintava più dopu ad essa si ritiratu da a corsa calchì sittimana fà, à prò di Pierre Marie Mancini, u merri di Costa, è cunsighjeru ghjinirali fendu parti di a maghjurità dipartimintali com’è Ange Pierre Vivoni. Pierre Marie Mancini hè statu elettu à l’unanimità, mittendu in ballu una guvernenza ghjunta da ogni parti, postu chì a prima vici presidenti sarà l’UMP Anne Marie Natali, u merri di Borgu, u sicondu vici presidenti Gilles Simeoni, naziunalistu muderatu è merri di Bastia, è u quattriesimu vici presidenti François Tatti, presidenti di a Cumunità d’Agglumerazioni di Bastia. Si tratta forsa di una risposta à certi chì qualificavani a candidatura di Pierre Marie Mancini, suvitata da u ritiru à l’infuria d’Ange Pierre Vivoni, com’è a risposta di Paul Giacobbi à l’allienza di una parti di a manca cù i naziunalisti muderati è a diritta pà cunquistà a merria di Bastia, di pettu à u prufilu più prugressistu d’Ange Pierre Vivoni.
Steti à senta à Pierre Marie Mancini.
