Pic de pollution enregistré à Ajaccio
(A redazzioni d'Alta Frequenza) - I stazioni di survighjenza di Qualitair Corse arrighjistreghjani in issu mumentu "un nivellu di pulluzioni di l'aria assai altun in Aiacciu. Un affari chì cuncerna l'elementi fini prisenti inde l'aria chì entrini inde u sistema respiratoriu. Si tratta di u primu gradu di pulluzioni, nivellu infurmazioni, chì faci chì a pupulazioni devi essa privinuta, frà altru i parsoni i più debbuli (parsoni anziani, zitelli, malati respiratorii, spurtivi...). I gradi attuali ùn ubligheghjani micca à a ghjenti di mudificà i so abitudini ma hè cunsigliatu quantunqua à i parsoni sinsibuli di ùn micca fà sforzi fora s'è i nivelli ùn sò ancu à calà, è dunqua, di rispittà bè i trattamenti medicali in corsu pà a respirazioni o d'adattà li dumandendu à u so medicu". Qualitair Corse ùn la priciseghja micca, ma ci voli à rammintà quantunqua chì issa situazioni si ripeti, ogni volta chì u Sciroccu soffia nant'à Aiacciu, è ch'ellu porta cun ellu una polvara assai fina ghjunta da u Sahara.
Sur le même sujet
