Parcu Naturali Regiunali di Corsica : a pusizioni di a maghjurità tarrituriali
(Michaël Andreani - Alta Frequenza) - Cunfarenza di stampa ssu marcuri da mani in Corti di l'eletti di a maghjurità tarrituriali, membri di u Sindicatu Mistu di u Parcu Naturali Regiunali di Corsica. Vuliani fà valè a so pusizioni cuncirnendu a numinazioni da u presidenti di u PNRC, Jacques Costa, d'un direttori generali aghjuntu, senza chì u cumitatu sindicali, nè mancu u scagnu di u Parcu sighini stati infurmati. Pà i raprisintanti di a maghjurità tarrituriali, Jacques Costa hà lanciatu cusì "una crisa gravi di guvernenza", inghjinnendu dinò risichi impurtanti, com'è una rumpitura "di cunfidenza trà u Parcu è a Cullittività di Corsica, chì hà da assicurà quist'annu 85% di u finanziamentu", un frenu inde l'addirizzata indispinsevuli di u Parcu, o ancu a pussibilità chì u Label ùn sighi micca rinnuvatu. U metudu è u fondu ùn poni essa accittati pà l'eletti chì dumandani à u presidenti di u PNRC di cunvucà à u principiu di l'annu chì veni una riunioni di l'assemblea deliberanti pà pudè dibatta di i sfarenti scelti. Si tratta quì, pà i membri di a maghjurità tarrituriali, di rispittà "i principii d'equità, di trasparenza è di culleghjalità chì si devini appiecà à tutti l'istituzioni induv'ella hè prisenti a Cullittività di Corsica".
Steti à senta à Hyacinthe Vanni pà a maghjurità tarrituriali.
Sur le même sujet
