Padduc : gros plan sur les fameux espaces stratégiques agricoles qui font débat

(A redazzioni d'Alta Frequenza) - L'Assemblea di Corsica hà cuntinuatu dopu meziornu (ghjovi) u dibattitu annant'à u ducumentu maestru di a mandatura Giacobbi, u famosu Padduc. Ogni gruppu hà vulsutu sprima u so accunsentu o micca pà un ducumentu chì duvarà dicida di l'avvena di a Corsica pà i 20 o i 30 anni chì venini. Ducumentu chì parmetti troppu affari pà certi, chì pruteghji troppu pà l'altri è chì strazia dunqua pà truvà u mezu ghjustu vali à dì un accunsentu generali. Aldilà di i cunsiderazioni troppu tennichi, parchì pà un ducumentu simuli si tratta soprattuttu di què, pari chì u votu sarà acquistatu malgradu tuttu. Ferma à sapè chì sarà a prupurzioni di voti pusitivi, parchì parechji amendamenti, 44 in tuttu, sò stati posti. Hè in funzioni di a validazioni o micca di ss'amendamenti ch'ellu s'hà da ditarminà u votu ed hè soprattuttu u gruppu Femu a Corsica chì darà u veru culori à ssu novu Padduc. A pusizioni di a diritta pari acquistata è ùn duvaria più cambià malgradu u travaghju in cumissioni, una decina di voti di quissa quì à u minimu duvaria andà contr'à a virsioni attuali di u Padduc. I gruppi naziunalisti ani inseritu dunqua amendamenti numarosi è s'ellu pari dighjà sicuru u votu di Corsica Libera, Femu ditarminarà u soiu di pettu à i risposti arricati à ss'amedamenti. U puntu di spiccanza maiò hè di sicuru quillu annant'à i spazii strategichi agriculi, chì pà u gruppu vinariani à equilibrà di manera impurtanti i famosi 105 000 ettari didicati à l'agricultura isulana. L'essenziali di u dibattitu, chì si farà dopu in cumissioni, purtarà dunqua annant'à ssu puntu. Maria Giudicelli hà rispostu ad ogni puntu dopu meziornu, à tutti l'offesi contr'à u Padduc. U travaghju in cumissioni hè principiatu dunqua è duvaria durà podassi duranti una bella parti di a nuttata. Aldilà di ssu dibattitu stessu, ci semi intarissati à u fundamentu veru di u prublema, ssi famosi spazii strategichi agriculi. Ghjaseppu Colombani, u presidenti di a Camara regiunali d'Agricultura, suvita ben intesu da vicinu vicinu ssu dibattitu parchì d'appressu à ellu, di l'avvena di l'agricultura corsa dipindarà soprattuttu u Padduc.

U stemi à senta.