Organisation du territoire : l'avis de Pierre Chaubon
(A redazzioni d'Alta Frequenza) - Duranti u so primu discorsu di Primu ministru à l'Assemblea naziunali, Manuel Valls hà fattu parechji annunzii, com'è par asempiu pà ciò chì tocca a riforma di i cullettività lucali. Riducia di mità u numaru di rughjoni, nova carta intercumunali, suppressioni di i cunsighji dipartimintali, una mansa di riformi chì duvariani essa missi in ballu nanzi à u 2021. Si sà chì a Corsica ùn duvaria micca essa tocca di manera sana da ssu cambiamentu maiò ind'a custruzzioni amministrativa di u paesi; in fatti hè sicura ch'ella ùn vultarà micca nentru à u rughjoni PACA. Ma l'altri riformi ponini un prublema è avemi pussutu veda dighjà calchì mesi fà un picculu principiu di risposta cù a scuntintezza maiò contr'à a riforma di i cantoni, senza parlà di u referendum di u 2003. S'è no aghjustemi à què l'appruntera di un novu statutu ipoteticu pà a Corsica, s'entri ind'un capatoghju d'urganisazioni di u tarritoriu tremendu chì pudaria disturbà parechji parsoni. Pierre Chaubon, pà contu soiu, sà bè induva ellu và; avia dighjà pinsatu dipoi un pezzu à ssa situazioni.
Steti à senta u presidenti di a cumissioni di i cumpetenzi legislativi è rigulamentarii di l'Assemblea di Corsica.
