Occupation de la MSA à Ajaccio par les Jeunes Agriculteurs
(A redazzioni d'Alta Frequenza) - U sindicatu di i ghjovani agricultori hà occupatu stamani (marti) duranti un tempu cortu a Mutualità Suciali Agricula, pà fà ricullà i so inchietudini annant'à dui punti assai pricisi. A debbita suciali agricula, sughjettu permanenti di capatoghju pà parechji agricultori, era di sicuru à u centru di i discussioni chì ani principiatu cù a direzzioni. Pari chì u dispusitivu pà sguassà ssa sebbita, chì era statu dicisu in u 2004, ùn sighi ancu à sbuccà. Un studiu novu hè statu appruntatu da a MSA è oghji nisun misura o dicisioni hè spuntata. Altru sughjettu di primura pà parechji ghjovani agricultori: a frebba catarrhale chì hà toccu parechji allevi è chì hà aghjustatu difficultà par unurà i dumandi di cutisazioni. Dopu à ss'articulu, u serviziu cumunicazioni di a MSA ci hà "cunsigliatu" di mudificà certi infurmazioni cunsidarati com'è micca ghjusti. A data citata - 2004 - hè bè scritta di manera chjara ind'u cumunicatu di u sindicatu JA. Pari evidenti chì una misura simuli pà sguassà una debbita ùn si faci micca in quattru è trè setti è dumanda una missa in asamini prima ind'u tempu, dunqua in u 2003 di sicuru. Pari evidenti dinò, è pà u sicondu puntu, chì ùn hè micca a MSA ella stessa, simplici urganisimu suciali, chì hà appruntatu ssa misura pà sguassà a debbita. S'hè fattu ben intesu, com'è misura propiu "pulitica", ind'i ministeri di l'Internu, di l'Agricultura, di l'Affari Suciali è di u Bughjettu.
Steti à senta à Régis Guénin, u direttori di a MSA annant'à ssi dui prublemi difficiuli.
