Neige en Haute-Corse : nouveau bilan
(A redazzioni d'Alta Frequenza) - A nevi fala sempri in Corsica Suprana. Un episodiu chì hà da cuntinuà à u minimu fin'è dumani matina (dumenica). Tutta a nuttata, a nevi hè falata di manera impurtanti nant'à u quartu nordu livanti di u dipartimentu. Stamani, a cellula di crisi era sempri attivata à a prifettura di Corsica Suprana. I mezi di a Cullettività Tarrituriali di Corsica è quilli di u Cunsighju Ghjinirali sò stati mubilizati nant'à u tarrenu da snivà l'assi maiò ; un affari cumplicatu da u fattu chì a nevi falessi sempri. Parechji stradi sicundarii fermani pruibiti à a circulazioni : RD 7 (Borgu), RD 107 (Lucciana), RD 237 (Viscuvatu), RD 37 (Vinzulasca), RD 406 (Sorbu Ocagnanu), RD 106 (Castellare è Penta di Casinca), RD 237 (Porri/ Silvarecciu, RS 6 Luretu di Casinca) RD 10 (Olmu Monte). U serviziu di a CTC hè statu ubligatu à intarvena da arricà risorzi in benzina pà a cintrali di Lucciana. Stamani (sabbatu), 510 casi erani privi d'elettricità, 10 ind'a Ghisunaccia è 500 in Omessa. ERDF s'hè datu di rimenu da truvà u prublema è da ristabiliscia u currenti inde issi casi. In issu mumentu, nivati ci sò sempri ad altitudina bassa o ancu in bor di mari. A nevi fala cù un ventu à Nordu Livanti inghjinendu assai cotru. I timperaturi fermani assai freti, falendu à 0 gradu nant'à i spondi è à spessu sottu à zeru inde l'internu (fiin'è -10 gradi). A notti, i cutrati si ghjiniralizeghjani ind'u centru è u cotru ad altitudina bassa fin'è dumenica. A più grandi prudenza hè dunqua racumandata.
Sur le même sujet
