Neige en Haute-Corse : la situation à mi-journée
(A redazzioni d'Alta Frequenza) - Cuntinueghja à nivà nant'à a Corsica Suprana. U dipartimentu hè sempri in vigilenza aranciu pà issu risicu "nevi". Veiculi di u SDIS facini missioni di ricunniscenza ind'i lochi i più tocchi da purtà s'ella ci voli succorsu à i parsoni in difficultà. Più nisuna casa hè priva d'elettricità dipoi arisera. Da u cantu di a circulazioni, nisunu prublema di particulari da francà a bocca di Vizzavona. Inveci, difficultà sò stati censati nant'à a strada naziunali 193 trà Casamozza è Ponte Leccia. Listessa affari nant'à a RN 198, a nevi appiendu toccu i lochi alti, ma dinò a piaghja ad altitudina bassa, è in particulari nant'à a costa urientali trà Bastiaè a Ghisunaccia. L'arnesi spiciali sò ubligatorii da francà i sfarenti bocchi di a reta dipartimintali, inveci chì quilla di Sorba hè sempri sarrata. I spiazzamenti devini essa limitati dinò à u più nicissariu è fatti fendu casu è cù prudenza.Da nutà chì quattru buli in partenza da l'aeruportu Bastia Poretta sò stati annulati stamani, par via di issi cundizioni meteurulogichi eccezziunali. Nivati forti sò aspittati pà a sirata è dumani matina (dumenica), cù timperaturi chì si stabiliscini, ghjiniralizendu di fattu u cotru. Eppo infini, una cellula di crisi hè stata attivata da i servizii di a merria di Bastia, da purtà aiutu à i parsoni soli o ind'u bisognu. Chjameti puru u 04 95 55 96 11, 04 95 55 96 12, è u 04 95 55 96 13.
