Neige en Corse : le point ce mardi matin
(A redazzioni d'Alta Frequenza) - A nevi hè falata torna ss’ultimi ori in Corsica, chì hè fin’è stanotti à u minimu in vigilenza arancia pà a nevi è u cotru. I nivati i più intensi sò arrighjistrati in u Centru di a Corsica. Cuncirnendu i stradi, a foci di Vizzavona hè aparta à i vitturi lebbii chì t’ani arnesi spiciali è pruibita à i camiò è à i bus. D’altrondi, tutti i grandi ligni di trenu sò supesi oghji, fora di quilli periurbani d’Aiacciu, di Bastia è di Balagna. I stabilimenti sculari di l'isula sò sarrati, fora di quilli di i cità d'Aiacciu è di Bastia. Hè u casu dinò pà i listessi raghjoni di l'Università di Corsica. Suspensioni dinò in Corsica sana di i trasporti sculari. Hè megliu à ùn spiazzassi micca, pà pudè parmetta à i squadri d'intarvinzioni di caccià a nevi da i stradi è d'avè l'arnesi spiciali s'è u spiazzamentu hè imperativu. Da un’antra banda, dipoi arisera, u ginnasiu Pascal Rossini in Aiacciu accogli i senza casa fin’è stanotti in u quadru di u pianu pà u fretu maiò ; a gistioni di l'accolta di ssi parsoni in u ginnasiu hè assicurata da a Croci Rossa Francesa. S'è vo rimarcheti una parsona senza casa o in difficultà, chjameti puru à u 115.
Sur le même sujet
