Municipales de Bastia : le rapporteur public du tribunal administratif préconise le rejet de la requête en annulation de l'élection
Marcuri, u tribunali amministrativu di Bastia hà lintatu un ochji à a dumanda d’annullazioni lli municipali, fatta da Jean-Sébastien de Casalta, Jean Zuccarelli è Jean-Martin Mondoloni, i capifila lla lista « Unione per Bastia ».
I rimprovari, in maior’parti, sò stati scantati da u rapurtadori publicu, francu ni dui. Trà quissi, dui lettari mandati u 9 è u 15 di ghjunghju, un pocu innanzi à u sicondu ghjiru, da Fabiana Giovannini, a prisidenti di l’Uffiziu Publicu di l’Abitatu, tandu. Issi lettari, ch’idd’ani ricivutu più di 2 700 pighjunanti, faciani u vantu di l’azzioni di Gilles Simeoni, u prisidenti llu Cunsigliu Esecutivu lla Corsica, in i prugrami di rinuvera aghjà avviati o à vena. Pà u rapurtadori publicu, issi lettari poni essa cunsidarati da « prumuzioni publicitaria » pà a lista di Pierre Savelli.
Dumanda ch’issi currieri, chì valini 3 300€ di spesa, sichini aghjunti à u so contu di campagna.
Inveci, à veda u scartu di i voti tamantu trà i dui listi pà u sicondu ghjiru, ùn dumanda, u rapurtadori, ch’idda sichi annullata tutta l’alizzioni, ma ch’idda sicha unicamenti invalidata l’alizzioni di Franck Dassibat, 33esimu è ultimu elettu lla lista « Bastia più forte Inseme ».
A dicisioni finali pudaria essa presa da quì à 15 ghjorna. Pà Jean-André Albertini, l’avucatu lli richiidenti, i rimprovari ritinuti ghjustifichighjani l’annullazioni tutali llu votu.
Steti lu à senta.
A difesa di Pierre Savelli, idda, hè in gran’parti suddisfatta da i chjudendi llu rapurtadori publicu. Ma ci hè ancu a spirenza ch’iddi sichini scantati tutti i rimprovari è dumandi di l’accusazioni.
Steti à senta l’avucatu Mathieu Stoclet.
