Municipales à Portivechju : Femu a Corsica appelle à l'union derrière Don-Mathieu Santini
Capture d'écran : Via Stella
(A ridazzioni d'Alta Frequenza) - In un cumunicatu, Femu a Corsica Suttanacciu parla di i municipali di Portivechju.
Dici chì postu chì i so soci lla maiurità tarrituriali ani presu parolla parichji volti, li tocca à fà cunnoscia publicamenti a so pusizioni, à un mumentu chì dui scelti strategichi pà l’alizzioni municipali ani da essa pruposti à l’alittori lla terza cità di Corsica :
- sichi un’alternativa à a maiurità in piazza, ed hè a scelta di Femu a Corsica
- sichi una lista cumuna daretu à Georges Mela, u merri attuali, ed hè quissa a scelta di u PNC è Corsica Libara
Par Femu a Corsica, quistioni, ùn ci n’hè chè una, ed hè quissa : « comu è quandu Portivechju è u Suttanacciu pudarani essa più forti, da pudè cuntribuì à a custruzzioni di a Corsica emancipata ? »
Pà u muvimentu, hè chjara a risposta : quandì a cità è u tarritoriu purtarani un prughjettu liatu à a visioni strategica chì a maiurità tarrituriali « Pà a Corsica » si hè ingagiata à difenda.
In chjudenda, dici u cumunicatu chì « a scelta di Femu a Corsica hè quidda di custruì l’alternativa a più larga, accuddindu di manera aparta l’attori suciali, culturali è ecunomichi lla « sucità civili » è i militanti pulitichi, liati in un prughjettu chjaru. Hè par quissa chì no’ ‘emu attaccatu à discorra cù Don Mathieu Santini, chì ci hà fattu sapè a so vulintà di purtà una lista chì viaghji cù issa logica. Chjamemu i nosci soci di Pà a Corsica à participà à issi discussioni, da fà nascia un andatura fatta à sensu è à spiranzi, in cunfurmità cù i nosci fundamintali cumuni ».
Eccu chivi u cumunicatu intrevu.
Sur le même sujet
