Municipales à Bastia : Gilles Simeoni prépare son retour
Hè quissu u sfuglittinu di a prima campagna di l’alizzioni municipali in Bastia : a scelta di a maiurità pà u so capilista, vali à dì quidda di u prossimu merri.
Dopu à uni beddi pochi di mesa di discursati interni à a maiurità è à Femu a Corsica, una scelta saria infini fatta, à senta ni à Via Stella, è ni pudemu oghji dà cunfirma : hè quidda di Gilles Simeoni.
A candidatura duvaria essa ufficializata innanzi à Natali, u prisidenti di l’esecutivu avaria sceltu di turrà à u cumandu d’issa cità ind’iddu fù merri da marzu di u 2014 à dicembri di u 2015. Ci vurrà forsa à sapè comu si n’hè ghjuntu à issa scelta chì sona, qual’ch’iddi sichini i spiicazioni, com’è un disapprovu di Pierre Savelli, chì saria quantunca prisenti, à ciò ch’iddu si senti, à nantu à a lista di Gilles Simeoni, in pusizioni d’altrondi d’essa elettu.
A dimarchja pudaria lià si à Cori in Fronti, è sariani d’altrondi aghjà in anda uni pochi di discussioni. Par quiddi chì oghji cumponini a maiurità, a prisenza di Pierre Savelli à nantu à a lista di Gilles Simeoni pudaria essa un dannu : Jean-Louis Milani, chì riprisenta à dritta in a maiurità bastiaccia, si hè sbandatu da u merri attuali chì hè un annu, è ùn voli più travaddà cù iddu.
U ritornu di Gilles Simeoni in mirria di Bastia libararia u postu di prisidenti di l’esecutivu, à l’assemblea di Corsica. Dui noma sariani stati intesi, quiddu di Jean-Félix Acquaviva, u prisidenti di l’uffiziu di i trasporti, è quiddu di Gilles Giovannangeli, u prisidenti di l’ADEC, l’unu issendu più puliticu è l’altru più tecnicu.
D’iss’affari, soca si ni parlarà in u sicretu llu gruppu Fà Populu Insemi, in fin’di sittimana, à paru à a sissioni di l’assemblea di Corsica.
