Municipales à Ajaccio et Bastia : cacophonie entre la direction du Rassemblement National et ses militants en Corse
Com’è « La république en marche », u « Rassemblement National » ùn ni duvaria avè, candidati, pà i municipali in Corsica. Dici u ghjurnali « le Figaro » chì Gilles Pennelle, u dirittori di campagna llu partitu di Marine Le Pen, pudaria sustena in Aiacciu a candidatura di François Filoni. Hè dighjà sustinuta, a so lista, da u muvimentu di Thierry Mariani, è ci duvaria participà Antoni Chareyre, u novu diligatu ufficiali di u RN in Corsica.
In quantu à Bastia, à senta sempri à « Le Figaro », a dirizzioni llu partitu dici ch’idd’ùn susteni mancu stampa a dimarchja di Filippo de Carlo, è ch’idda si hè alluntanata da Charles Giacomi è da u so fiddolu Jean-Antoine, chì hè terzu à nantu à a lista « Bastia Forza Nova ».
Parvia d’issu pusiziunamentu, hè stata vispina a risposta di Jean-Antoine Giacomi.
Mintuvendu una lettara di sustegnu à Filippo de Carlo ch’idd’ani signatu sedici anziani candidati di u partitu in Corsica – trà i quali Tony Cardi, l’anzianu capifila llu FN in l’isula – Jean-Antoine Giacomi s’inzerga contru à una dicisioni senza ghjudiziu, chì metti à u scaccu u RN in Corsica ». Jean-Antoine Giacomi si ni pidda à François Filoni chì, à senta lu, hà sempri disprizzatu u RN, i so militanti è i so alittori ». Po’ si ni pidda dinò à a dirizzioni llu partitu, parlendu di « trappuli »mentri a campagna di l’alizzioni aurupeani.
Infini, Jean-Antoine Giacomi rigreta ch’iddi sichini scantati « militanti storichi, sinceri è benevulanti… chì ani sempri luttatu par fà crescia l’idei di u RN in Corsica ». L’affari pudaria « essa à veru una ruvina pà i prossimi prisidinziali, in Corsica è in a spadduzzera, a diasporà ».
