Municipales 2014: Corsica Libera plus que jamais déterminé
(A redazzioni d'Alta Frequenza) - Eri dopu meziornu (dumenica), Corsica Libera urganizava a so Ghjunta, chì hà adunitu i dilegati di i sizzioni di l'isula sana. À u prugrammu, discussioni inghjiru à u primu appuntamentu di ssu vennari u 22 di nuvembri in Parighji trà eletti di l'Assemblea di Corsica è di u guvernu pà dibatta di i sfarenti avanzati istituziunali pussibuli pà l'isula vutati cù una bellissima maghjurità nentru à l'emiciculu tarrituriali, ci vultaremi. Altru puntu chì hè statu ammintatu duranti ssa riunioni, l'alizzioni municipali di marzu di u 2014. Rammintemi chì Corsica Libera andarà solu à a battaghja in Bastia com'è in Purtivechju, ancu s'è un'unioni à u sicondu ghjiru cù l'altra cumpunenti di u muvimentu naziunalistu Femu a Corsica in ssi dui cità ùn devi micca essa sclusa; infini in Aiacciu è in Corti, Corsica Libera è Femu a Corsica ani dicisu d'uniscia si nentru à una sola lista d'apartura. Malgradu a diversità è a cumplessità di u ghjocu puliticu in ogni cumuna, Corsica Libera si voli imponi à tutti i patti à l'uccasioni di ss'alizzioni, fendu valè più cà mai l'idei di u muvimentu naziunali.
Steti à senta à Ericu Simoni, presidenti di a Ghjunta di Corsica Libera è candidatu à i municipali in Bastia.
