Météo à surveiller pour un épisode de vent violent et de neige en Corse-du-Sud
(A redazzioni d'Alta Frequenza) - Météo France hà missu a Corsica Suttana in vigilenza gialla, cù un tempu chì duvaria divintà gattivu cù dui fenomeni pricisi : u ventu viulenti è un episodiu di nevi. Un episodiu di ventu viulenti hè annunziatu in fatti ind'a notti di sabbatu à dumenica. Ind'a parti à Punenti di u dipartimentu, i valori annunziati sò di 100 chilometri à l'ora in buffulata. Pudariani cullà fin'è 120 chilometri à l'ora, o ancu 140 chilometri à l'ora annant'à u latu urientali, soprattuttu ind'u settori trà Sari Sulinzara è Purtivechju. Ss'episodiu sarà accumpagnatu da acquati forti cù cumuli trà 30 è 50 mm, par asempiu annant'à a parti uccidintali. A limita acqua è nevi hè à 1 100 metri cù quantità pudendu cullà da 10 à 20 cm. Pà ciò chì tocca l'episodiu di nevi, pà a ghjurnata di dumenica, a situazioni evulueghja cù una calata impurtanti di i timperaturi, liata à u cambiamentu d'urientazioni di u ventu (ventu di settori Nordu, chì soffia trà 60 è 80 chilometri à l'ora). Ssa calata di i timperaturi sarà più impurtanti pà i lochi di muntagna. Un regimi di marzulati è di nevi si stalla ind'u dipartimentu. A limita acqua è nevi cala trà 600 è 800 metri. Pà certi lochi, i quantità aspittati poni essa trà 5 è 10 cm. Ssi cundizioni dumandani una vigilenza strema di tutti, è in particulari pà a pratica d'attività in a natura, è pà tutti i spiazzamenti. Poni cambià di manera pessima. Hè dunqua racumandatu di tenasi à capu di l'evuluzioni di a situazioni.
Sur le même sujet
