Liberté d'expression : la Corse s'est massivement mobilisée ce dimanche
(A redazzioni d'Alta Frequenza) - C’hè stata una vera marighjata umana di guasgi 30 000 parsoni ssa dumenica ind’i carrughji di i cità maiò di Corsica pà pudè participà à i marchji privisti pà manifistà un sustegnu è una voglia di mantena a libertà. In Aiacciu, trà 12 è 15 000 parsoni sò andati da a Gara fin’è a Cullittività Tarrituriali di Corsica, mentri chì più di 2 000 parsoni s’erani aduniti in Purtivechju sempri in ssu cuntestu. In Bastia, 11 000 parsoni, puliticanti, rilighjosi, ghjurnalisti è sucità civili sò partuti da u Palazzu di Ghjustizia pà falà fin’è a piazza San Niculà induva una scena era stata muntata in furia. Ghjovani studienti, raprisintanti di i culti cattolicu, ghjudeu è musulmanu, omi pulitichi, raprisintanti di a Liga di i Diritti di l’Omi è tant’altri sò cullati annant’à a scena pà fà discorsi, cù musichi à mezu o stratti di soni ind’u tonu. S’hè rimarcatu, com’è puntu neru, a vulintà accanita di certi parsunalità pulitichi di mustrassi à tutti i patti ancu inde ssi circustanzi quì, certi purtendu ancu una sciarpa à trè culori ch’elli ùn ani mancu u dirittu di purtà. L'urganisatori di a manifistazioni, Anthony Casanova, chì cunnosci bè Charlie Hebdo, hà fattu sapè chì ghjurnalisti è disegnadori satirichi di Francia sana l'ani mandatu missaghji di filicitazioni dopu à u striscionu tucchendu u Qatar mustratu da sustenidori di u SC Bastia duranti a partita contr'à u Parighji Saint Germain, era di sicuru assai cummossu.
U stemi à senta.
Sur le même sujet
