Le Secrétaire d'Etat Olivier Dussopt en Corse pour poser les bases du travail interministériel
(A redazzioni d'Alta Frequenza) - Olivier Dussopt, Secretariu di Statu pà u ministru di l'azzioni è di i conti publichi, era in Aiacciu ssu luni. Dopu avè participatu in principiu di matinata à l'uparazioni di cuntrolli di i Dugani inde l'aeruportu Nabuliò Bonaparte, hè statu ricivutu da u presidenti di l'Esecutivu di Corsica, prima scuntrà altri raprisintanti di u Statu nant'à l'isula, com'è a Direzzioni regiunali di i finanzi publichi è u scagnu di l'associu di i merri di Corsica Suttana. S'ellu c'hè sempri un blucchimu puliticu nant'à u latu custituziunali, rigretta Gilles Simeoni, u dialogu devi cuntinuà nant'à i quistioni liati à l'autunumia fiscali di a Cullittività di Corsica, i so risorzi bughjettarii è à l'infrastrutturi à prò di i Corsi è di l'ecunumia isulana. U presidenti di l'Esecutivu hà fattu sapè da un'antra banda ch'ellu ricusava di signà u dispusitivu di cuntrattualisazioni finanziaria prupostu da u Statu à i cullittività chì t'ani spesi di funziunamentu chì trapassani 60 millioni d'auri à l'annu, ingaghjendu quissi quì à ùn francà un nivellu di crescita d'1,2% à l'annu contr'à l'assicuranza di dutazioni statali stabuli. U scopu di ssa visita ùn era micca di fà annunzii, ma di pona i basi di u travaghju interministiriali chì principia, nanzi a visita d'una decina d'altri ministri da quì à calchì simana pà travaghjà nant'à sfarenti sughjetti cuncreti.
Steti à senta à Olivier Dussopt, Secretariu di Statu pà u ministru di l'azzioni è di i conti publichi.
Sur le même sujet
