Le rapporteur public déboute Jacques Seguela
(A redazzioni d'Alta Frequenza) - U rappurtadori publicu di a corti d'appellu di Marseghja ùn hè micca andatu à prò di i dumandi di Jacques Séguéla. Iss'ultimu asaminava in appellu una dumanda di 1,4 millioni d'auri furmulata da Jacques Séguéla contr'à a cumuna di Bunifaziu pà indennizà un parmissu di custruiscia annulatu in issa cità. A dicisioni difinitiva sarà resa da quì à 15 ghjorni, parchì u presidenti di a prima camara di a corti amministrativa d'appellu di Marseghja hà missu a so dicisioni in deliberazioni. Rammintemi chì in u 2007, u coppiu Séguéla avia cumpratu in Cala Longa, un tarrenu di dui ettari pà 1,37 millioni d'auri, dopu avè uttenutu l'autorisazioni di custruiscia ci una residenza di 568 m2 da a cumuna. In issu mentri, u parmissu di custruiscia eppo u pianu lucali d'urbanisimu erani stati annulati in ghjustizia dopu à azzioni ingaghjati da l'associu di difesa di l'ambiu ABCDE. Jacques Séguéla avia dicisu tandu di dumandà à essa indennizatu da a cumuna. Ind'un prima tempu, di lugliu di u 2010, u tribunali amministrativu di Bastia avia datu tortu à u coppiu, chì hà fattu appellu. Dumanda righjittata torna oghji da u rappurtadori publicu, chì hà stimatu chì "scumessa era stata fatta chì u PLU saria mantinutu", com'è u parmissu di custruiscia. "Ani presu un risicu chì avaria pussutu fà li vincia assai, ani persu è pudemi capiscia a so dillusioni", hà dittu quissu quì.
