Le Direct

Laurent Lokoli courageux mais en ballotage défavorable

Photo : Facebook Laurent Lokoli

(A redazzioni d'Alta Frequenza) - U primu ghjiru di a fasa finali omi di Roland Garros prupunia ssu marti una partita trà u corsu Laurent Lokoli, 19 anni, è 402imu mundiali, è l'americanu Steve Johnson, 67imu mundiali. Sustinutu cù forza è rimori da isulani chì ani invaditu i lochi stretti di u tarrenu numaru 7, u ghjucadori di u tennis club di Costa Verde hè passatu vicinu à una surpresa. In fatti, hà guadantu i dui primi sets di un scontru in cinqui sets. Dopu à un primu set rializatu cù putenza è vintu 6-4, Laurent Lokoli hè andatu à circà cù una forza tremenda un sicondu set chì era bè ingaghjatu, postu ch'ellu vincia 5-2, ma l'hà guadantu infini à u tie break 7-6 dopu à un ritornu di l'americanu. Laurent Lokoli hà mancatu di pocu a vittoria, guadagnendu 4-0 in u terzu set, ma Johnson ùn hà cappiatu nulla, è hà purtatu u corsu fin'è u tie break, pà buscà si lu è vincia 7-6 ind'u terzu set. In u quattriesimu set, Laurent Lokoli hà cuminciatu à divintà più debbuli à u nivellu fisicu è à strazià pà andà di fronti contr'à un americanu chì hà ritrovu a cunfidenza è a forma, pà veda infini ss'ultimu vincia u set 6-3 è vultà à paru dui sets à dui. U cinquesimu è ultimu set hà cuminciatu quandu a notti hè calata, è hà cunfirmatu par disgrazia a tindenza di u set scorsu. Ma l'oscurità hè ghjunta à u succorsu di Laurent Lokoli, postu chì l'arbitru hà dicisu d'arristà a partita à 3-1 inde l'ultimu set pà Steve Johnson. Ferma solu à spirà chì Laurent Lokoli pudissi passà una bona notti pà ripighjà a suprana in ssa partita, purtà altu i culori di a Corsica è cuntinuà appena di più u so sonniu.