La question corse s'invite dans le conflit entre l'Azerbaïdjan et la France
Saria, a Corsica, arnesi di disturbu puliticu ? Pò vena a quistioni, vistu u intaressu subitaniu di l’Aserbaigianu à a quistioni di a piazza lla Corsica in francia.
Issi pochi ghjorna, dui canali di televisioni azerini, è supr’à tuttu un canali d’infurmazioni turcu impurtanti tinutu da un azziunariu azerinu, erani in Corsica.
Via telecronichi è emissioni in diretta, ani discrittu una Corsica chì n’hè à dumandà à so indipindenza di pettu à un macron chì faci a riprissioni di i militanti indipindintisti.
Senza cuntà ch’iddu hè natu in Baccù, in cori à u parlamentu d’Azerbaigianu, u gruppu di sustegnu à u populu corsu. Via un cumunicatu, issu gruppu pidda a pratesa di u muvimentu indipindintistu Nazioni.
Dici issu gruppu chì « fà saltà à porta d’una casa cù zitidduchji in drintu, hè segnu di falsità, pà un paesu chì si prisenta da viculu di i dritti di l’omu. Issi viulenzi, una volta di più, dani a prova chì a francia ùn a si hà ancu lacata a so mentalità culuniali, è ch’idda ùn hà un’anghjicula di rispettu pà i dritti fundamintali di i populi di i so culunii attuali ».
Iss’intaressu pà a Corsica t’hà i so raghjoni : l’Azerbaigianu hè in cunflittu diplumaticu cù a francia parvia di u tarritoriu di l’Altu Karabagh.
D’uttrovi, a francia hà mandatu matiriali militaru à l’Arminia, par ch’idda si posca difenda contru à l’assalti di l’Azerbaigianu à nantu à issu tarritoriu.
L’Azerbaigianu, chì rimpruvarighja à a francia a so ingirenza in i so affari interni, si ghjova di a chistioni corsa com’è par risponda li.
