La mobilisation pour demander la démolition des villas Ferracci ne faiblit pas
(A redazzioni d'Alta Frequenza) - Trà 150 è 200 parsoni si sò ritrovi arimani (dumenica) à l'intrata di Bunifaziu, à a chjama di u cullittivu "Pà u rispettu di a legi è a demulizioni di i casi d'A Rundinara". I manifistanti si sò ritrovi à l'intrata di a pruprietà di Pierre Ferracci, induv'ella hè nata a pulemica dopu a custruzzioni di casi nant'à un situ classificatu rimarchevuli da u PLU. Ramintemi chì a dicisioni di ghjustizia di u 5 lugliu scorsu hà cundannatu a SCI di Pierre Ferracci à un millioni d'auri d'amenda pà infrazzioni à u codici di l'urbanisimu, ancu s'è ssi custruzzioni sò, d'appressu à a ghjustizia, "menu gattivi pà l'ambienti di pettu à quilli chì erani stati autorizati da u parmissu tacitu". Di fatti, a distruzzioni di i casi ùn hè micca stata dumandata. Hè ssu puntu quì chì metti in zerga in membri di u cullittivu, chì dumandani oghji a demulizioni di i casi è a riparazioni di u situ. À mezu à ssi manifistanti, parechji parsunalità pulitichi, com'è Paul Félix Benedetti di u Rinnovu, François Benedetti di Pè a Corsica è Jean Yves Torre di Via Campagnola. Dopu à ss'adunita, i manifistanti si ni sò andati in u calmu.
