La Haute-Corse toujours en proie aux flammes
(A redazzioni d'Alta Frequenza) - A Corsica Suprana ferma sempri marturiata da i fiari cù fochi novi è uparazioni di trattamentu chì cuntinueghjani nant'à sinistri più anziani. In Barbaghju, sò oramai 450 ettari di machja chì sò stati distrutti da i fiari chì s'avvicinani da u Poghju d'Oletta. Un focu chì ùn hè ancu fissatu, induva 200 omi intarvenini, ma dinò mezi aerei. I stradi dipartimintali D 38 è D 238 sò sarrati par avà, sicondu u SDIS 2B. Una trentina di bugni hè stata distrutta dopu à ssu focu. In A Lucciana, trè fochi sò stati arrighjistrati in principiu di dopu meziornu ; un prima in un campu à u nivellu di a Canonica cù una superficia chjuca, un sicondu à u nivellu di u ghjiratoghju di Casamozza chì hà distruttu un ettari è u più impurtanti à u nivellu di u Colibri, chì hà brusgiatu trà 5 è 6 ettari di vegetazioni. Nant'à ss'ultimu, una cinquantina d'omi ma dinò i Canadair, i Tracker è u Dash sò intarvinuti. In Fucichja, in u Curtinesi, trà 3 è 4 ettari di vegetazioni sò stati distrutti ; l'elicotteru chì lampa l'acqua, dui Tracker è spinghjifochi numarosi sò stati mubilizati. Infini c'hè statu un focu in una casa in L'Isula, in un lutissamentu, versu 2 ori. Si tratta di un alloghju di 120 m2 cù parechji nivelli è u fumu chì ghjunghjia sicondu i primi elementi racolti da u suffittu. Quattru famighji, vali à dì ondeci parsoni, duvariani essa presi in carica da a municipalità pà truvalli un alloghju. (ritrattu : SDIS 2B)
Sur le même sujet
