La FNAIM au chevet du logement
(A redazzioni d'Alta Frequenza) - A Corsica, si sà, s'hè lanciata nant'à a via difficiuli di l'arrigulamentu di i prublemi di l'alloghju. Ind'a perspettiva glubali d'elaburazioni di u Padduc ci hè stata, rammintemu la, a fasa ditta di "l'Assisi di u fundariu è di l'alloghju", un mezu di fà un bilanciu, o ancu di sgaghjà anguli da truvà suluzioni. Tuttu u settori di l'immubiliari è frà altru l'agenzi aduniti inghjiru à a FNAIM, ani studiatu assai u sughjettu è oghji a federazioni arreca pruposti cuncreti. Ci voli à dì chì a fini di i dispusitivi attuali in materi d'uparazioni immubiliari, legi Sellier, imprestiti à tassu zeru, s'aghjunghji à a dibbulezza di più in più maiò di u settori bancariu. A crisa hà purtatu di sicuru una calata di i prezzi di u marcatu, ma issa calata ferma assai chjuca, 1,5 à 2,5%, ciò chì faci chì i prezzi fermani assai alti. A FNAIM pensa chì misuri d'accumpagnamentu pà quilli chì comprani pà a prima volta un alloghju duvariani essa presi da i puteri publichi, cullettività di Corsica, dipartimenti, cumuni. Issi pruposti sò finalizati è a federazioni scuntrarà da quì à pocu i sfarenti istituzioni.
Écoutez Pierre-Paul Carette, président de la FNAIM Corse.
Sur le même sujet
