La confiance au gouvernement Bayrou en jeu ce lundi
A partita di luni dopu meziornu, davanti à l’assemblea francesa, pari persa innanzi d’essa ghjucata, par françois bayrou è u so guvernu.
Malgradu un ghjiru midiaticu sfrinatu, pari ch’idd’ùn ci sichi manera ch’iddu a si sfranchi d’issu votu contru à a cunfidenza, è dunqua di a fini llu so guvernu, in cunfurmità cù l’articulu 49-1 di a custituzioni. In Corsica, ùn hà da essa chè Xavier Lacombe, u diputatu di a prima circuscrizzioni llu Pumonti, à vutà a cunfidenza.
Michel Castellani, François-Xavier Ceccoli è Paul-André Colombani s’ani da astena.
Tandu, ùn sò chè dui i pussibilità :
- a prima, hè a numinazioni d’un altru primu ministru, forsa dopu à u discorsu di ricunniscenza da a francia di u statu di Palistina, ch’iddu duvaria dì emmanuel macron à l’ONU da quì à dui sittimani. Sicondu a virsura pulitica d’issu ministru, ci vurrà à valutà s’iddi fermani i pussibilità di dà un seguitu à u prucessu d’autunumia lla Corsica.
- a siconda pussibilità hè quidda di a sciolta di l’assemblea francesa. L’alizzioni lighjislativi duvariani vena tandu in i quattru à sei sittimani dopu, ma a sciolta di l’assemblea pudaria avè par cunsiquenza a sciolta di u prucessu d’autunumia in a crisa pulitica prufunda chì tuccaria a francia.
