Jean Zuccarelli et François Casasoprana s'unissent pour les territoriales
(A redazzioni d'Alta Frequenza) - L'ufficialisazioni d'intenzioni si multiplicheghjani à manca, à cinqui mesi di i tarrituriali. Dopu à u MCD di François Tatti, hè un ticchettu Cismonti è Pumonti chì principia a so strada, Jean Zuccarelli è François Casasoprana. Volini parlà à i Corsi di ciò ch'elli cunsidareghjani essa i veri prublemi di a Corsica, vali à dì u suciali, l'impiegu è l'ecunumia, inveci di u statutu di residenti o di a cuufficialità, rivindicazioni ghjudicati com'è micca rialisti. U currenti naziunalistu, qualificatu di separatistu da u presidenti di l'ADEC, ferma l'avversariu principali di i dui omi, Jean Zuccarelli prisintendu François Casasoprana com'è l'omu chì hà dittu innò à Corsica Libera in Aiacciu duranti l'ultimi municipali, mentri chì ss'ultimu pensa chì Pasquale Paoli "saria tristu di veda di chì manera hè trattatu ciò ch'ellu hà lasciatu da quilli chì si rivindicheghjani di a so sterpa". Vulendu purtà una Corsica arradicata ind'a Republica Francesi, partini quantunqua cù u pesu di scunfitti eletturali maiò, ch'ella si trattessi di i municipali in Aiacciu pà François Casasoprana, o di i municipali eppo di i dipartimintali chì ani vistu i cumpagni di Jean Zuccarelli arrighjistrà una perdita impurtanti d'eletturatu in una cità di Bastia chì era soia prima.
I dui omi partini malgradu tuttu cù a cunfidenza di u challenger com'ellu a ci spiega François Casasoprana.
